1025.
पट्टे ढाळू आम्ही विष्णुदास जगी । लागो नेदू अंगी पापपुण्य ॥१॥
निर्भर अंतरी सदा सर्वकाळ । घेतला सकळ भार देवे ॥धृपद॥
बळिवंत जेणे रचिले सकळ । आम्हा त्याचे बळ अंकितांसी ॥२॥
तुका म्हणे आम्ही देखत चि नाही । देवाविण काही दुसरे ते ॥३॥

अर्थ :
या विश्वामध्ये आम्ही एकच असे शुर शिपाई दांडपट्टा खेळणारे आहोत कि जे अंगाला पाप पुण्य लागू देत नाहीत. आम्हा विष्णुदासांच्या अंतःकरणामध्ये सदासर्वकाळ आनंद भरलेला आहे व आमच्या योगक्षेम आता भारही या देवाने घेतलेला आहे. जो सर्वशक्तीमान आहे ज्याने या जगाची निर्मिती केली आहे त्याचेच शक्ती आम्हा हरिदासांना आहे. तुकाराम महाराज म्हणतात या देवा वाचून आम्ही दुसरे काही जाणत नाही व पाहत नाही.