1725.
पैल घरी जाली चोरी । देह करी बोंब ॥१॥
हाबा हाबा करिसी काय । फिराऊनि नेटया वाय ॥धृपद॥
सांडुनिया शुद्धी । निजलासी गेली बुद्धी ॥२॥
चोरी तुझा काढिला बुर । वेगळा भावा घातले दूर ॥३॥
भलतियासी देसी वाव । लाहेसि तू एवढा ठाव ॥४॥
तुका म्हणे अझुनि तरी । उरले ते जतन करी ॥५॥

अर्थ :
देहाच्या पलीकडे असलेल्या आत्मवस्तूची चोरी झाली व त्यामुळे अज्ञान निर्माण होऊन जीव “मी व माझे” असे बोंब मारीत आहे. अरे तू पुन्हा फिरुन या भवसागरातील गोष्टींसाठी हाव का करतो आहेस ? ज्ञान विसरुन गेलास त्यामुळे तुझी शुध्द हरपली आणि त्या कारणानेच तुझी आत्मभूती नष्ट झाली आहे. तुझी आत्मवस्तू चोरीला त्यामुळे तुझे ऊर दडपून गेले आहे खरे तर तुला आत्मभावापासून वेगळे करुन प्रकृतीभावात दूर नेऊन टाकले आहे. अरे तू भलत्याच गोष्टींना वाव देत बसलास त्यामुळे तुला अशी स्थिती प्राप्त झाली आहे. तुकाराम महाराज म्हणतात, “मागे जे झाले ते झाले आता तुझ्याकडे जे आत्मप्राप्तीचे साधने उरले आहेत तेवढे तू जतन कर. ”