2472.
भेदाभेद ताळा न घडे घालिता । आठवा रे आता नारायण ॥१॥
येणे एक केले अवघे होय सांग । अच्युताच्या योगे नामे छंदे ॥धृपद॥
भोंवरे खळाळ चोर वाटा घेती । पावल मारिती सिवेपाशी ॥२॥
तुका म्हणे येथे भावेविण पार । न पविजे सार हे चि आहे ॥३॥

अर्थ :
भेद आणि अभेदाचा ताळा बसणे हे सहज शक्य नाही ते आपल्याला कळणारही नाही त्यामुळे साधकाहो तुम्ही आता नारायणाला आठवा. जर नामाचा छंद लावून घेतला तर त्याचे सर्व कार्य यथा संग पूर्ण होतात आणि अच्युताशी भेट होण्यास योग येत असतो. ज्याप्रमाणे नदीत पोहणाऱ्याला भवऱ्यापासून धोकाच असतो तो भवरा त्याला बुडवू शकतो त्याप्रमाणेच अगदी गावाच्या शिवेपर्यंत आलेल्या त्या वाटसरुला चोर पुरते लुबाडतात त्याप्रमाणे साधकाने शेवटपर्यंत आपली स्थिती स्थिर ठेवावी त्याला मोक्ष प्राप्त होईपर्यंत धोकाच असतो. तुकाराम महाराज म्हणतात कोणताही भाविक भक्त असो, साधक असो, जिज्ञासू असो, मुमुक्षु असो तो भक्तिभावे वाचून भव नदीच्या पार जाऊ शकत नाही हेच परमार्थातील मुख्य सार आहे.