2353.
नामसंकीर्तन साधन पै सोपे । जळतील पापे जन्मांतरे ॥१॥
न लगती सायास जावे वनांतरा । सुखे येतो घरा नारायण ॥धृपद॥
ठायींच बैसोनि करा एकचित्त । आवडी अनंत आळवावा ॥२॥
रामकृष्णहरीविठ्ठलकेशवा । मंत्र हा जपावा सर्वकाळ ॥३॥
याविण आणीक असता साधन । वाहातसे आण विठोबाची ॥४॥
तुका म्हणे सोपे आहे सर्वांहूनि । शाहाणा तो धणी घेतो येथे ॥५॥

अर्थ :
सर्व साधनांमध्ये नामसंकीर्तन साधन हे सर्वात सोपे असून त्याने अनेक जन्मातील पापे जळून जातात. हरी ची प्राप्ती करून घेण्यासाठी वनात जाऊन तपसाधना करण्याची गरज नाही तर केवळ घरी बसून नामसंगकीर्तन केल्याने सुखासुखी नारायण आपल्या घरी येतो. तुम्ही जिथे असाल तेथे बसूनच एकचित्त करून आवडीने अनंताला आळवा. राम कृष्ण हरी विठ्ठल केशवा हा मंत्र सर्वकाळ जपावा. लोकहो नामा पेक्षा इतर सोपे साधन हरीची प्राप्ती करून घेण्यासाठी कोणतेही नाही हे मी विठोबाची शपथ घेऊन सांगत आहे. तुकाराम महाराज म्हणतात नामसंगकीर्तन हे साधन सर्वात सोपे आहे आणि जो शहाणा म्हणजे परिपूर्ण विचारी मनुष्य आहे तोच याचा अंगीकार करत असतो.