3023.
आजिवरी होतो संसाराचे हाती । आता ऐसे चित्ती उपजले ॥१॥
तुला शरणागत व्हावे नारायणा । अंगीकारा दिना आपुलिया ॥धृपद॥
विसरलो काम याजसाठी धंदा । सकळ गोविंदा माझे तुझे ॥२॥
तुका म्हणे विज्ञापना परिसावी । आवडी हे जीवी झाली तैसी ॥३॥

अर्थ :
आतापर्यंत मी संसाराच्या हाती होतो परंतू आता माझ्या चित्तात असे आले आहे, की हे नारायणा तुम्हाला शरण यावे त्यामुळे आपल्या दीनभक्ताचा तुम्ही अंगीकार करावा. हे गोविंदा मी तुझ्यासाठी माझा सर्व कामधंदा आणि माझे तुझे ही भावना देखील विसरलो आहे. तुकाराम महाराज म्हणतात, देवा माझ्या जीवाला जी तुम्हाला शरण येण्याची आवड निर्माण झाली आहे ती माझी विनंती तुम्ही मान्य करावी.