60.
ज्या नामे अनंत न कळे संकेत । वेदाचाही हेत हारपला ॥१॥
ते रूप सानुले यशोदे तान्हुले । भोगिती निमोले भक्तजन ॥२॥
अनंत अनिवार नकळे ज्याचा पार । जेथे चराचर होते जाते ॥३॥
निवृत्तिसंकेत अनंताअनंत । कृष्णानामे पंथ मार्ग सोपा ॥४॥

अर्थ:
अनंत नाम असणाऱ्या परमात्याचे यथार्थ वर्णन करायला वेदांचा ही विचार खुंटला. तो परमात्मा यशोदेच्या घरी तान्ह्या रुपात आल्यावर भक्तांना ही विनासायास त्याचा लाभ झाला.अनंत व अनिवार रुपाच्या परमात्माचा पार लागत नाही.त्याच्यात अनेक चराचरे घडत व बिघडत असतात निवृत्तिनाथ म्हणतात अनंत असलेला परमात्मा जाणण्याचा उपाय म्हणजे कृष्णनामपंथ होय.