1450.
कायावाचामनें निग्रह करी । कीर्तन सर्व भावे ऐके निर्धारी । अष्टांग साधन न करी । सुखे करी कीर्तन ॥१॥
देव तुष्टेल तुष्टेल । सर्वभाव तुझा पुरवेल॥ध्रु॥
शांती क्षमा दया उन्मनी । आशा मनीषा तृष्णा दवडोनी । काम क्रोध मद लोभ बंदीखानी । घालीं नेउनी निर्धारे ॥२॥
सर्वांभुतीं समदृष्टी । पाहे सर्व एकमय सृष्टी । तरी ऐक्य कीर्तनगोठीं । परमानंदे आल्हाद ॥३॥
धरी संतांचा सांगात । कीर्तनी करी शुद्ध चित्त । एका जनार्दनी वचनार्थ । राम हरि गोविंदा ॥४॥