155.
चतुरानन घन अनंत उपजती । देवो देवी किती तयामाजि ॥१॥
तेंचि हे सांवळे अंकुरले ब्रह्म । गोपसंगे सम वर्ते रया ॥२॥
निगमा नाठवे वेदाचा द्योतुकु । तो चतुर्भुज देखु नंदाघरी ॥३॥
निवृत्ती म्हणे शंखचक्रांकितमूर्ति । आपण श्रीपति क्रीडतसे ॥४॥

अर्थ:
त्याच्या स्वरुपात कित्येक देव देवता नव्हे नव्हे ब्रह्मदेव ही उपजतो. तेच ब्रह्मस्वरुप सावळे सुंदर रुप घेऊन त्या गोपाळांबरोबर समानतेची वर्तणुक करताना दिसते. तेच परब्रह्म वेदांचे द्योतक असुन ही वेदांने ते समजत नाही. तोच चतुर्भुज परमात्मा नंदाचा कृष्ण झाला आहे. निवृतिनाथ म्हणतात, शंखचक्रांकित असलेला लक्ष्मीचा मालक गोकुळात नवनविन क्रिडा करतो आहे.