1936.
माझिये जातीचे मज भेटो कोणी । आवडीची धणी फेडावया ॥१॥
आवडे ज्या हरी अंतरापासूनि । ऐसियाचे मनी आर्त माझे ॥धृपद॥
तयालागी जीव होतो कासावीस । पाहातील वास नयन हे ॥२॥
सुफळ हा जन्म होईल तेथून । देता आलिंगन वैष्णवांसी ॥३॥
तुका म्हणे तोचि सुदिन सोहळा । गाऊ या गोपाळा धणीवरी ॥४॥

अर्थ :
माझ्या आवडीची इच्छा पूर्ण करण्याकरता माझ्या जातीचा म्हणजे माझ्यासारखाच हरिभक्त वैष्णव मला कोणीतरी भेटो. ज्यांना हरी विषयी अंतकरणापासून प्रेम आहे अंतकरणापासून ज्यांना हरी आवडतो अशा हरिभक्तांची भेट मला व्हावी अशी आर्त इच्छा माझ्या मनात आहे देवा. त्यांच्यासाठीच माझा जीव कासावीस होतो आणि त्यांना पाहण्यासाठी माझे डोळे त्यांची वाट पाहत आहेत. वैष्णवांना एकदा की आलिंगन दिले त्यावेळेपासून माझा जन्म सुफळ होईल. तुकाराम महाराज म्हणतात ज्या वेळेला आमची आणि वैष्णवांची गाठ होईल तो सुदिन सोहळा असेल आणि आम्ही मिळून या गोपाळाचे नांव तृप्ती होईपर्यंत गात राहू.