3711.
(खेळावरील रूपके : टिपरी)
या रे गडे हो धरू घाई जाणता ही नेणता । नाम गाऊ टाळी वाहू अपुलिया हिता ॥१॥
फावले ते घ्यारे आता प्रेमदाता पांडुरंग । आजि दिवस सोनियाचा वोडवला रंग ॥धृपद॥
हिंडती रानोरान भुजंग ते कांट्यावन । सुख तयांहून आम्हा गाता नाचता रे ॥२॥
तुका म्हणे ब्रम्हादिका सांवळे दुर्लभ सुखा । आजि येथे आले फुका नाम मुखा कीर्तनी ॥३॥

अर्थ :
सवंगड्यानो, आपण जानते, नेनते कसेही असलो तरी त्वरित परमार्थाचा मार्ग धरुया. स्वहितासाठि हरिनाम घेत टाळी वाजवु. आजचा दिवस सोन्याचा रंग घेउनच आला आहे तो तुम्ही घ्यावा श्रीरंगाचा जो रंग लाभला आहे, तो प्रेम देणारा पांडुरंग आहे. कित्येक साधक संसाररूपी रानावानात हिंडतात तेथे काम क्रोध रूपी भुजंग आहेत पण आम्हाला हरिचे नाम गाताना, नाचताना अत्यंत सुख प्राप्त होते. तुकाराम महाराज म्हणतात, जे ब्रम्हादिकांना दुर्लभ आहे ते श्रीकृष्णचे सावळे रूप आहे, परंतु आज कीर्तनात त्याचे नांव घेतले व त्याचा लाभ झाला आहे.