513.
हीच त्याची पंचभूते । जीवन भाते प्रेमाचे ॥१॥
कळवळा धरिला संती । ते निगुती कैवाड ॥धृपद॥
हाच काळ वर्तमान । समाधान ही संपत्ती ॥२॥
तुका म्हणे दिवसराती । हेचि खाती अन्न ते ॥३॥

अर्थ :
ईश्वराविषयीचे प्रेम हेच या भक्तांचे जीवनदायी अन्न आणि पंचमहाभूतात्मक शरीर असते. संतानी हरी विषयीचा कळवळ चित्तामध्ये धारण केला आहे आणि तसाच निर्धार करून त्याचा स्वीकार केला आहे. नेहमी समाधान रुपी संपत्ती जवळ बाळगणे हा त्यांचा वर्तमान काळ असतो. त्यांच्या हृदयात अखंड समाधान नांदत असते. त्यामुळे त्यांना सर्व काळ सारखाच वाटत असतो. तुकाराम महाराज म्हणतात हरी भक्त हे रात्रंदिवस प्रभूप्रेमच्या ब्रम्ह रसाचे भोजन करत असतात.