129.
यज्ञान्न मागण्याविषयी गोपास आज्ञा

प्रात:काळी सांगे सकळांसी कृष्ण । नका घेऊ अन्न आज कोणी ॥१॥
सोडोनिया गायी चालीले वनासी । गडी ह्लषी-केशी खेळताती ॥२॥
वर्जियले आम्हा नका घेऊ अन्ना । खावे काय कृष्णा आजी आता ॥३॥
गडीयांसी सांगे वैकुंठींचा राणा । सांगावे ब्राह्मणा जावोनिया ॥४॥
वनी उपवासी आहे रामकृष्ण । द्यावे त्यासी अन्न कृपा करोनी ॥५॥
गोपाळासी तेव्हा धाडी वासु-देव । पाहावया भाव याज्ञिकांचा ॥६॥
जोडोनिया हात वंदिती द्विजांसी । धाडिले आम्हांसी कृष्णनाथे ॥७॥
नामा म्हणे ऐसे सांगती गोपाळ । याज्ञिका सबळ अभिमान ॥८॥