2349.
पांडुरंगे पांडुरंगे । माझे गंगे माउलिये ॥१॥
पान्हा घाली प्रेमधारा । पूर क्षीरा लोटो दे ॥धृपद॥
अंगे अंग मेळउनी । करी धणी फेडाया ॥२॥
तुका म्हणे घेइन उड्या । सांडिन कुड्या भावना ॥३॥

अर्थ :
हे माझे गंगे माऊली पांडुरंगे, तु मला तुझा प्रेमरूपी पान्हा पाज एवढेच नाही तर तुझ्या प्रेम रूपी दुधाचा पूर माझ्यावर लोटु दे. तु माझी तृप्ती करण्याकरता आपले अंग माझ्या अंगात मिळवून ठेव. तुकाराम महाराज म्हणतात एकदा की तुझा प्रेम रुपी पान्हा मी पीलो की मी आनंदाने उड्या मारीन व मनातील सर्व वाईट भावना बाजूला टाकून देईन.