1906.
खावे ल्यावे द्यावे । जमा खर्च तुझ्या नावे ॥१॥
आता चुकली खटपट । झाड्या पाड्याचा बोभाट ॥धृपद॥
आहे नाही त्याचे । आम्हा काम सांगायचे ॥२॥
तुका म्हणे चिंता । भार वाहे तुझ्या माथा ॥३॥

अर्थ :
देवा आम्ही जे काही खातो जे काही वस्र नेसतो पाघरतो जे काही देवाणघेवाण करतो त्या सर्व जमाखर्चाचा हिशोब तुझ्याच नावावर आम्ही करत असतो. त्यामुळे आता आमचे रोजचे हिशोब ठेवण्याची जी खटपट आहे ती चुकली आहे आणि कोणालाही हिशोब देण्याची गरज पडत नाही म्हणजे त्याचा भोबटा होत नाही. आमच्याजवळ काय आहे किंवा काय नाही हे सांगण्याची आम्हाला गरजच काय राहते ? तुकाराम महाराज म्हणतात देवा आता आमचा सर्व योग क्षेमाचा भार आता तुझ्या माथ्यावर घातला आहे त्यामुळे आम्हाला चिंता करण्याची गरज राहिली नाही.