1278.
विठ्ठला विठ्ठला । कंठ आळविता फुटला ॥१॥
कारे कृपाळू न होसी । काय जाले मज विशी ॥धृपद॥
जाल्या येरझारा । जन्मां बहुतांचा फेरा ॥२॥
तुका म्हणे नष्टा । अबोलण्या तुझ्या चेष्टा ॥३॥

अर्थ :
देवा, विठ्ठला विठ्ठला म्हणता म्हणता माझा कंठ फुटला आहे. मी हाक मारून देखील तू माझ्या विषयी कृपाळू का होत नाही. तुला माझ्याविषयी काय झाले आहे ? देवा तुझ्यासाठी मी पुष्कळ येरझार्‍या घातल्या आहेत. तुकाराम महाराज म्हणतात अरे नाष्टा तू केलेल्या चेष्टा सांगण्यासारख्या नाहीत.