306.
कारितसे स्नान अयोध्येचा पाळक | वस्त्र अमोलिक परिधान ॥१॥
लावोनिया भाळी कस्तुरी केशर | करी नमस्कार वसिष्ठासी ॥२॥
पुण्याहवाचनी बसे दशरथ | त्रिभुवनी समर्थ तूंचि एक ॥३॥
वेदमंत्र घोष करिती ऋषीश्वर | पुष्पे सुरवर वरुषती ॥४॥
आणिती आहेर अयोध्येचे जन | करिती गायन गायक जे ॥५॥
नाचती अप्सरा वाजती नगारे | वाजंत्री तुतारे भोंवारे ही ॥६॥
|गुलालाची धूम रंग वस्त्रावरी | बंदीजन द्वारी गर्जताती ॥७॥
नामा म्हणे इंद्रे पाहोनिया सभा | नाही ऐसी शोभा चित्ती म्हणे ॥८॥