376.
अकार उकार मकार ओंकार ।
प्रणव हा साकार सुरेख रे ॥१॥
मसुरामात्र सार योगी ध्याती देही ।
निरंजन पाही मग तेंची ॥२॥
ज्ञानदेव म्हणे देह झाले देव ।
प्रणवची शिव अनुभवे ॥३॥

अर्थ :
अकार, उकार, मकार व अर्धमात्रा मिळून प्रणवरूप ओंकार, साकार व सुंदर बनला आहे. याच ओंकाराचा आकार मसुराच्या डाळी एवढा मानून आपल्या देहातच योगी लोक परब्रह्म रूपाचे ध्यान करतात. हा ओंकारच ब्रह्म आहे. त्या ओंकाराच्या अनुभवाने देह, देव व ओंकार हे तिन्ही ब्रह्मरूप आहेत असे माझ्या अनुभवाला आले. असे माऊली ज्ञानदेव सांगतात.