1969.
सिंचन करिता मूळ । वृक्ष ओलावे सकळ ॥१॥
नको पृथकाचे भरी । पडो एक सार धरी ॥धृपद॥
पाणचोऱ्याचे दार । वरील दाटावे ते थोर ॥२॥
वश जाला राजा । मग आपुल्या त्या प्रजा ॥३॥
एक आतुडे चिंतामणी । फिटे सर्व सुखधणी ॥४॥
तुका म्हणे धावा । आहे पंढरिये विसावा ॥५॥

अर्थ :
झाडाच्या मुळाला जर पाणी घातले तर संपूर्ण झाड टवटवीत होऊन वोणावले जाते. त्यामुळे इतर कोणत्याही देवदेवतांचे किंवा वेगवेगळ्या ठिकाणाच्या भरीस तुम्ही पडू नका सर्व सारांचे जे सार आहे त्याचीच तुम्ही कास धरा. गारुड्या जवळ पानचोर नावाचे एक भांडे असते त्याला अनेक प्रकारची छिद्रे असतात त्यात पाणी ओतले आणि वरून जर त्या भांड्याला झाकण लावले तर छिद्रे असतांनाही पाणी गळण्याचे थांबते. केवळ राजाला जरी वश केले तर संपूर्ण प्रजा आपल्या वश होते. एक चिंतामणी जरी आपल्या हाती लागला तरी सर्व सुख आपल्याला आपोआप प्राप्त होतात. तुकाराम महाराज म्हणतात एक पंढरी क्षेत्र असे आहे की तेथे विसावा आहे त्यामुळे तेथे तुम्ही धावा घ्यावा.