637.
कांडील्या कुटिल्या होतो मांडा । आळसे धोंडा पडतसे ॥१॥
राग नको धरू मनी । गांडमणी सांगतो ॥धृपद॥
तरटापुढे बरे नाचे । सुते काचे मुसळ ॥२॥
तुका म्हणे काठी सार । करी फार शाहाणे ॥३॥

अर्थ :
चांगले कणिक असले तरच मांडा हा पदार्थ चांगला होतो. अन्यथा कनिकाचा धोंडाच पदरात पडतो. आम्ही जे तुम्हाला काही सांगतो त्याचा राग मनात धरू नको. तरट संबंध घेतले तर मुसळ त्यामुळे झिजत नाही. पण दोरीचे वेढे मुसळाला असले आणि दोरी सतत फिरवली तर त्या मुळे मुसळाला काचे पडतात. तुकाराम महाराज म्हणतात एखाद्या मूर्ख मनुष्याला जर वठणीवर आणायचे असेल तर काठी हे त्याचे सार आहे.