1140.
अगा करुणाकरा करितसे धावा । या मज सोडवा लवकरि ॥१॥
ऐकोनिया माझी करुणेची वचने । व्हावे नारायणे उतावीळ ॥धृपद॥
मागे पुढे अवघा दिसे रिता ठाव । ठेवूनि पायी भाव वाट पाहे ॥२॥
उशीर तो आता न पाहिजे केला । अहो जी विठ्ठला मायबापा ॥३॥
उरले ते एक हेचि मज आता । अवघे विचारिता शून्य जाले ॥४॥
तुका म्हणे आता करी कृपादान । पाउले समान दावी डोळा ॥५॥

अर्थ :
हे करूणाकरा मी तुझा मनापासून धावा करत आहे त्यामुळे तुम्ही लवकर धावत‌ या आणि मला या भवसागरातून सोडवा. माझी करूण वचने ऐकून माझ्या भेटीकरिता उतावीळ व्हावे. देवा मी मागेपुढे पाहिले तर मला तुमच्या वाचुन सर्व ओस दिसले त्यामुळे मी तुमच्या चरणावर माझा भक्तीभाव अर्पण करून आता तुमची वाट पाहत आहे. विठ्ठला मायबापा तुम्ही आता माझ्या भेटी करता थोडा देखील उशीर करू नका माझ्यासाठी आता तुमच्या भेटीवाचुन काहीच उरले नाही. आणि या जगाविषयी श्युन्य मत माझे झाले आहे. तुकाराम महाराज म्हणतात देवा आता तुम्ही एवढेच करा की तुमचे विटेवरचे समचरण मला लवकर दाखवा.