2277.
जाणावे ते काय नेणावे ते काय । ध्यावे तुझे पाय हेचि सार ॥१॥
करावे ते काय न करावे ते काय । ध्यावे तुझे पाय हे चि सार ॥धृपद॥
बोलावे ते काय न बोलावे ते काय । ध्यावे तुझे पाय हे चि सार ॥२॥
जावे ते कोठे न वजावे आता । बरवे आठविता नाम तुझे ॥३॥
तुका म्हणे तू करिसी ते सोपे । पुण्ये होती पापे आमुच्या मते ॥४॥

अर्थ :
देवा काय जाणावे किंवा काय नाही जाणावे हे जाणून घेण्यापेक्षा सर्व साधनांचे सार म्हणजे तुझे पाय आहे व तेच चित्तात धरून त्याचेच ध्यान करावे. काय करावे किंवा काय नाही करावे हे जाणून घेण्यापेक्षा सर्व साधनाचे सार म्हणजे तुझे पाय त्याचेच चिंतन चित्तात करावे. देवा काय बोलावे किंवा काय नाही बोलावे हे जाणून घेण्यापेक्षा तुझ्या पायाचे चिंतन करावे हे सर्व साधनांचे सार आहे. कोठे जावे आणि कोठे जाऊ नये हे मला काही आता समजत नाही तुझ्या नामाचे चिंतन करावे एवढेच मला बरे वाटते. तुकाराम महाराज म्हणतात देवा तु जे काही करतो ते सर्व सोपे होते आहे येर्‍हवी आम्ही आमच्या मतांनी काही करायला गेलो तर आमच्या कडून पापाच होते.