382.
गुजगुजीत रूप सांवळे सगुण ।
अनुभविता मन वेडे होय ॥१॥
भ्रमर गुंफा ब्रह्मरंध्र ते सुरेख ।
पहाता कवतूक त्रैलोकी ॥२॥
आनंदस्वरूप प्रसिद्ध देखिले ।
निजरूप संचले सर्वांठायी ॥३॥
ज्ञानदेव म्हणे या सुखाची गोडी ।
अनुभवाची आवडी सेवी रया ॥४॥

अर्थ :
भगवान श्रीकृष्णाचे शामसुंदर सुकुमार रूप पाहून मन वडे होऊन जाते हे रूप योग्यांना ब्रह्मरंध्रातील भ्रमर गुंफेत दिसते. ते पाहून त्यांना झालेला आनंद त्रैलोक्यात मावत नाही असे हे प्रसिद्ध आनंदमय दिसणार रूप आपली स्वरूपाहन भिन्न नाही. आत्मस्वरूप सर्वत्र भरले आहे. या सुखाची गोडी अनुभवानेच सेवन केली पाहिजे. असे माऊली ज्ञानदेव सांगतात.