3603.
(वारकरी परत आल्या नंतरचे अभंग)
आले ते आधी खाईन भातुके । मग कवतुके गाईन ओव्या ॥१॥
सांगितला आधी आइको निरोप । होईल माझा बाप पुसे तो ते ॥२॥
तुका म्हणे माझे सखे वारकरी । आले हे माहेरीहून आजि ॥३॥

अर्थ :
माझ्या मायबापाने पाठविलेला खाऊ मी आधी खाईन आणि मग कौतुकाने त्यांच्या ओव्या गाईन. माझ्या मायबापाने मला पाठवलेला मी निरोप प्रथम ऐकेन माझ्याविषयी जे जे काही विचारले ते मी प्रथम ऐकेन. तुकाराम महाराज म्हणतात, माझे सखे वारकरी आज माहेराहून म्हणजे पंढरीहून परत घरी आले आहेत.