19.
ध्येय ध्यान मनी उन्मनी साधनी । लाविता निशाणी ध्यान मागे ॥१॥
ते रुप सधन गुणागुण संपन्न । ब्रह्म सनातन नांदे विटे ॥२॥
विठ्ठल नाम सार ऐसाचि निर्धार । मुक्ति पारावार ती अक्षरी ॥३॥
निवृत्ति निवांत राहिला निश्चिंत । केला मथीत पुंडलिका ॥४॥

अर्थ:
ध्येय ध्यान ध्याता ही त्रिपुटी निरास पावली की उन्मनी अवस्था प्राप्त होते. त्याची निशाणी हे योगी ध्यान मानतात.योग्यांचे ते ध्यान जे सर्व गुणांनी युक्त आहे तेच विटेवर उभे आहे. त्यामुळे श्री विठ्ठल नाम हेच सार असा निर्धार करुन ती मुक्ती प्राप्त झाली आहे. तोच हा परमात्मा आहे हे पुंडलिकाने सांगितल्यामुळे निवृत्तिनाथ निवांत राहिले.