1301.
नसतो किविलवाणे । काही तुमच्या कृपादाने ॥१॥
हेचि तयाची ओळखी । धाले टवटवित मुखी ॥धृपद॥
वाया जात नाही । वचन प्रीतीचे ते काही ॥२॥
तुका म्हणे देवा । सत्य येते अनुभवा ॥३॥

अर्थ :
देवा तुम्ही माझ्यावर कृपा केली असती तर मी असा केविलवाणा दिसलो नसतो. ज्याचे मुख टवटवीत आहे तो तृप्त झाला असे समजावे. आणि हीच तुमच्या कृपेची खरी ओळख आहे. देवा तुम्ही एखाद्या बरोबर काही शब्द प्रेमाने बोलला तर ते शब्द कधीच वाया जात नाहीत. तुकाराम महाराज म्हणतात देवा जे सत्य आहे ते अनुभवाला येते, म्हणजे मला तुमची कृपा झाली असती तर त्याचा अनुभवही आला असता.