21.
नाही यासि गोत नाही यासी कुळ । शेखी आचारशीळ कोण म्हणे ॥१॥
बाळरुपे हरि गोकुळी लोणी चोरी । त्या यशोदा पाचारी थान द्यावया ॥२॥
सोवळा हरि वागवी शिदोरी । तो गोपालांच्या करी काला देतु ॥३॥
निवृत्ति संपुर्ण काला देतु जाण । ब्रह्मसनातन गोकुळीचे ॥४॥

अर्थ:
एको ह ह्या वेदवाक्यानुसार हे परमतत्व एकटे आहे त्यामुळे त्यास कुळ व नाती नाहीत. तो अकर्तुम असल्याने तो कर्म करतो असे कसे म्हणता येईल. हा परमात्मा गोकुळात एकीकडे लोणी चोरत असताना दुसरीकडे पान्हा अनावर झाल्यामुळे यशोदा त्यास स्तनपानासाठी बोलवत असे. पण सत्वगुणी सोज्वळ शिदोरी ही हा परमात्मा बाळगतो व त्यातील काला गोपाळांच्या हाती खायला देतो. निवृत्तीनाथ म्हणतात गोकुळीच्या ह्या ब्रह्मसनातनाने आपला स्वस्वरुप काला गोपाळांना वाटला.