154.
गोधने चाराया जातो शारंगपाणी । मार्गी भेटली राधिका गौळणी ।
कृष्ण दान मागे निरी आसडोनी । तंव ती देखिली यशोदा जननी ॥१॥
यशोदा म्हणे नाटका हृषीकेशी । परनारीसी कैसा रे झोंबसी ।
येरु रुदत सांगतो मातेपाशी । माझा चेंडु लपविला निरिपाशी ॥२॥
राधिका म्हणे यशोदे परियेसी । चेंडु नाही नाही वो मजपाशी ।
परि हा लटिका लबाड हृषीकेशी । निरी आसडिता चेंडु पडे धरणीसी ॥३॥
यशोदा म्हणे चाळका तुम्ही नारी । मार्गी बैसता क्षण एक मुरारी ।
एका जनार्दनी विनवी श्रीहरी । नाम घेता पातके जाती दुरी ॥४॥