387.
भाव तैसे फळ । न चले देवापाशी बळ ॥१॥
धावे जातीपाशी जाती । खुण येरयेरा चित्ती ॥धृपद॥
हिरा हिरकणी । काढी आतुनि आइरणी ॥२॥
तुका म्हणे केले । मन शुद्ध हे चांगले ॥३॥

अर्थ :
ज्याचा जसा भक्तांचा भक्तिभाव असेल तसाच देव त्या भक्तांसाठी होत असतो बळेच शक्ती दाखवून देव प्रसन्न करता येत नाही. जात जाती कडे धावते कारण एका जातीच्या माणसांना परस्पराची खुण कळते. खरा हिरा ऐरणीवर ठेऊन त्याच्या वर घाव घातला, तरी तो फुटत नाही. तुकाराम महाराज म्हणतात हिरा असो, हिरकणी असो, तो ऐरणीत शिरतो. मन असे हिऱ्यासारखे शुद्ध करावे ते फुटता कामा नये.