366.
शून्य हे चार महाशून्य दिसतसे ।
निजरंग वसे सर्व त्यात ॥१॥
ऐसा रंग जया लाधतांचि पाही ।
मनाची ही सोई हारपली ॥२॥
ज्ञानदेवाचा बोल बोलण्यांचे रूप ।
निवृत्तिस्वरूप सर्वत्र हे ॥३॥

अर्थ :
योगाभ्यासी पुरूष ज्या तेजोमय नील बिंदुकडे पाहतात ते शून्य चार भागांत विभागलेले असून त्यातील सर्वांच्या आतील भाग तो महाशून्यच होय. व त्यातच ब्रह्मतत्त्व साठवलेले आहे. अशी ज्याची दष्टी झाली. त्याच्या मनाचा मनपणा नाहिसा होतो. आमचे बोलणे शब्दरुप जरी दिसले तरी ते सर्व निवृत्तीस्वरुपच आहे असे माऊली ज्ञानदेव सांगतात.