398.
पंढरीचे सुख जिही अनुभविलें|भावे अनुसरले विठ्ठलपायीं॥१॥
काया वाचा मन रंगले चरणी|धरियेला मनी पांडुरंग॥२॥
नामाचेनि बळे उडविली साधनें|तोडीली बंधने संसाराची॥३॥
योगियांचे घर रिघे काकुलती|आव्हेरिले संती म्हणोनियां॥४॥
दोन्ही कर जोडोनि मोक्ष पाहे वास|म्हणे मी होईन दास हरिदासाचा॥५॥
तंव तुच्छ करोनी न पाहाती दृष्टि|आपंगिले शेवटी ब्रह्मज्ञानीं॥६॥
अष्ट महासिद्धी म्हणती कवण गति|यावे काकुलती कवणा आम्ही|७|
मोक्ष मुक्ति जिही हाणितल्या पायीं|आमुची ते सोयी काय धरिती|८|
ऐसी सर्व जीवा त्रीदेवासी पूज्य|ते एक राज्य केले पुंडलिकें॥९॥
हर्षे निर्भर नामा नाचे महाद्वारीं|मुखी निरंतरी नामघोष॥१०॥