2056.
नाही पाइतन भूपतीशी दावा । धिग त्या कर्तव्या आगी लागो ॥१॥
मुंगियांच्या मुखा गजाचा आहार । न साहावे भार जाय जीवे ॥२॥
तुका म्हणे आधी करावा विचार । शूरपणे तीर मोकलावा ॥३॥

अर्थ :
ज्याच्या पायात घालायसाठी पायतान नाही परंतु राजाशी बरोबरी करतो अशा माणसाचा धिक्कार असो आणि त्याच्या कर्तव्याला आग लागो. हत्तीला रोजचा जो आहार द्यायचा आहे तो जर मुंगीला दिला तर त्या आहाराच्या भारानेच मुंगीचा जीव जाईन. तुकाराम महाराज म्हणतात आधी आपल्या मध्ये किती सामर्थ्य आहे याचा विचार सैन्यातील शिपायाने करावे आणि मगच हातात बाण घेऊन शत्रूवर बाण सोडवावा.