1462.
तुज पाहावे हे धरितो वासना । परि आचरणा ठाव नाही ॥१॥
करिसी कैवार आपुलिया सत्ता । तरि च देखता होइन पाय ॥धृपद॥
बाहिरल्या वेषे उत्तम दंडीले । भीतरी मुंडले नाही तैसे ॥२॥
तुका म्हणे वाया गेलोंच मी आहे । जरि तुम्ही साह्य न व्हा देवा ॥३॥

अर्थ :
देवा तुला पहावे अशी इच्छा मी करत आहे परंतु तुझी भेट व्हावी असे आचरण माझे मात्र नाही. देवा तू माझा अभिमान धरला आणि तुझ्या सत्तेने तू माझा कैवारी झाला तर मला तुझ्या पायाचे दर्शन होईल. देवा मी माझ्या बाह्य रूपाने माझ्या शरीराला उत्तम प्रकारे रंगविले आहे परंतु माझ्या अंतरंग मध्ये मनाचे मुंडण मी केले नाही. तुकाराम महाराज म्हणतात तुम्ही मला सहाय्य केले नाही तर मी वाया जाईल.