36.
श्रीभगवान व वसुदेव यांचे गोकुळी नंदाघरी प्रयाण व मथुरेस बंदीखान्यांत मायेचे आगमन.

उचलिला कमळापती । पायींची बंधने गळती ॥१॥
त्रै-लोक्यांत जो न माय । त्यासी बंधन करील काय ॥२॥
कवाडे उघडती । देखतांची देवाप्रती ॥३॥
मंद मंद पडे पाऊस । शिरी छाया करी शेष ॥४॥
पूर चढला अचाट । त्यासी लविला अंगुष्ट ॥५॥
त्वरे आला नंदाघरी । निद्रिस्थ त्या नरनारी ॥६॥
ठेवी तेथे कृष्णजीला । माया घेऊनि निघाला ॥७॥
रडे माया करी आक्रांत । नामा ह्मणे उठवी दूत ॥८॥