1303.
गोड तुझी ब्रीदावळी ।
गोड गाता नित्यकाळी ।
गोड भक्त भावे बळी ।
तू वनमाळी त्यापाशी ॥१॥
गोड तुमची नामे गाती ।
गोड कीर्तनी उभे ठाकती ।
गोडा गोड तू श्रीपती ।
त्याची भुक्ति मुक्ति तूचि तू ॥२॥
गोड त्याचे स्वानुभव ।
तुमच्या पायी ठेविला जीव ।
गोड भक्ति दृढभाव ।
तुमच्या चरणी लिगटले ॥३॥
गोड त्याचे याती कुळ ।
गोड सत्कर्म ते सोज्वळ ।
गोड त्याचे बुध्दीबळ ।
तुज धरिले निश्चये ॥४॥
निळा म्हणे त्यांची मती ।
गोड कीर्तनी नवी स्फूर्ती ।
गोड तुमची सगुण मूर्ती ।
ह्रदयी त्याचे स्थिरावली ॥५॥