1066.
एक पाहातसा एकाची दहने । सावध त्या गुणे का रे न व्हा ॥१॥
मारा हाक देवा भय अट्टाहासे । जव काळाऐसे जाले नाही ॥धृपद॥
मरणांची तव गांठोडी पदरी । जिणे तोचि वरी माप भरी ॥२॥
तुका म्हणे धींग वाहाती मारग । अंगा आले मग हालो नेदी ॥३॥

अर्थ :
हे लोकांनो तुम्ही एखाद्या माणसाचे स्मशानात दहन झालेले पाहता मग त्या योगाने तुम्ही सावध का बरे होत नाहीत ? जोपर्यंत तुम्ही काळाच्या आधीन झालेले नाहीत तोपर्यंत तुम्ही भय पूर्वक आक्रोश पूर्वक त्या देवाला हाका मारा. जेव्हा तुम्ही जन्मता तेव्हा तुम्ही तुमच्या पदरात मरणाची गाठोडे घेऊन येता. मनुष्य जगणे हे तोपर्यंत असते जोपर्यंत त्याच्या आयुष्याचे माप भरलेले नाही. तुकाराम महाराज म्हणतात जे लोक परमार्थ करण्यासाठी परमार्थाच्या मागे लागत नाही त्यांच्या जीवनाचा धिक्कार असो कारण मरणाचे मार्ग सारखे चालूच आहेत आणि त्या काळाच्या मनात आले तर तो आपल्याकडे आला तर तो आपल्या अंगाला हलु देणार नाही.