2482.
आजिचे हे मज तुह्मी कृपादान । दिले संतजन मायबापी ॥१॥
आली मुखावाटा अमृतवचने । उत्तीर्ण ती येणे नव्हे जन्मे ॥२॥
तुका म्हणे तुह्मी उदार कृपाळ । शृंगारिले बाळ कवतुके ॥३॥

अर्थ :
हे संतजन हो माय बाप हो तुम्ही आज मला हे कृपा दान दिले आहे, तुमच्या कृपेमुळे माझ्या वाणीद्वारे भक्ती बोधपर अमृत वचने बाहेर पडत आहे त्यामुळे या जन्मी तरी मी तुमच्या उपकारातून उत्तीर्ण होऊ शकत नाही. तुकाराम महाराज म्हणतात हे संतांनो तुम्ही कृपाळू आहात उदार आहात तुम्ही तुमचे आध्यात्मिक अलंकार माझ्या म्हणजेच तुमच्या बालकाच्या अंगावर चढवले आणि त्याचे तुम्हीच कौतुक करत आहात.