1597.
नको नको मना गुंतू मायाजाळी । काळ आला जवळी ग्रासावया ॥१॥
काळाची हे उडी पडेल बा जेव्हा । सोडविना तेव्हा मायबाप ॥धृपद॥
सोडवीना राजा देशीचा चौधरी । आणीक सोइरी भली भली ॥२॥
तुका म्हणे तुला सोडवीना कोणी । एका चक्रपाणी वाचूनिया ॥३॥

अर्थ :
हे मना तू प्रपंचाच्या मोहजाळात मायाजाळामध्ये गुंतू नकोस तुला गिळून टाकण्याकरता काळ जवळ आला आहे. ज्यावेळी तुझ्यावर काळाची झडप पडेल तेव्हा तुला त्याच्यातून तुझे मायबाप देखील सोडवणार नाहीत. त्यावेळी तुला देशाचा राजा चौधरी आणि इतरही तुझे मोठे मोठे नातेवाईकही सोडविणार नाहीत. तुकाराम महाराज म्हणतात, “एका चक्रपाणीवाचून तुला त्यावेळी कोणीही सोडविणार नाहीत. ”