901.
संतांच्या धीक्कारे अमंगळ जिणे । विश्वशत्रु तेणे सांडी परि ॥१॥
कुळ आणि रूप वाया संवसार । गेला भरतारी मोकलिता ॥धृपद॥
मूळ राखे तया फळा काय उणे । चतुर लक्षणे राखो जाणे ॥२॥
तुका म्हणे सायास तो एके ठायी । दीप हाती तई अवघे बरे ॥३॥

अर्थ :
संतानी ज्याचा धिक्कार केला आहे त्याचे जिने अमंगळ आहे व तो सर्व विश्वाचा शत्रू आहे. जर एखाद्या पतीने त्याच्या पत्नीचा त्याग केला असेल तर तिचे कुळ व रूप हे संसारिक दृष्ट्या व्यर्थ आहेत. झाडाच्या मुळाचे जर रक्षण केले तर मग झाडाला चांगली फळे येण्यास काय उणे असते. त्याप्रमाणे आपल्या हिताच्या गोष्टी रक्षण करणे व सांभाळ करणे याला चातूर म्हणावे. तुकाराम महाराज म्हणतात अंधारामध्ये हातात दिवा असावा म्हणजे जेथे प्रयत्न करायचा तेथे त्या योग्य ठिकाणी प्रयत्न करवा.