499.
पंढरीसी जाय । तो विसरे बापमाय ॥१॥
अवघा होय पांडुरंग । राहे धरूनिया अंग ॥धृपद॥
न लगे धन मान । देहभावे उदासीन ॥२॥
तुका म्हणे मळ । नासी तात्काळ ते स्थळ ॥३॥

अर्थ :
पंढरीला जातो त्याला त्याच्या माय बापाची देखील आठवण राहत नाही. तो स्वतःच पांडुरंगरूप होतो आणि त्याच स्थितीत राहतो. मग त्याला कोणत्याही प्रकारचा मान-सन्मान धन द्रव्य लागत नाही कारण तो देहा विषयी उदासीन झालेला असतो. तुकाराम महाराज म्हणतात पंढरपूर हे क्षेत्र त्रिगुणरुपी मलाचा तात्काळ नाश करणारे आहे.