444.
भक्ताचिया काजा अवतार धरी | कृपाळू श्रीहरी सांचोकार ॥१॥
तो हा महाराज चंद्रभागे तीरी | उभा विटेवरी पांडुरंग ॥२॥
वेद नेले म्हणोनि मत्स्य जाला हरी | शंखासुरा मारी आफळोनि ॥३॥
समुद्र मंथनी मंदार बुडाला | कांसव तो जाला तया तळी ॥४॥
हिरण्याक्षे धरा नेता रसातळा | वराहरुपे त्याला वधियेले ॥५॥
प्रल्हादासी पिता गांजी नानापरी | स्तंभी नरहरी प्रगटला ॥६॥
देवाचिया काजा वामन भूतळी | बळीसी पाताळी घातियेला ॥७॥
भूमिभार जाला क्षत्रियांचे कुळी | केली नि:क्षत्रिय परशुरामे ॥८॥
सीतेचिया काजा रावण मर्दिला | सूर्यवंशी जाला रामचंद्र ॥९॥
गोकुळी जन्मला श्रीकृष्ण आठवा | होऊनि पांडवा साहाकरी ॥१०॥
भक्ताचिया काजा बौद्ध अवतार | जाला दिगंबर अवनिये ॥११॥
कलंकि अवतार होणार श्रीहरी | तेव्हा पृथ्वीवरी तृण न उरे ॥१२॥
नामा म्हणे तुझे अनंत अवतार | काय मी पामर बोलू वाचे ॥१३॥