1206.
होऊ नको काही या मना आधीन । नाइके वचन याचे काही ॥१॥
हटियाची गोष्टी मोडून टाकावी । सोई ही धरावी विठोबाची ॥धृपद॥
आपुले आधीन करूनिया ठेवा । नाही तरि जीवा घातक हे ॥२॥
तुका म्हणे जाले जे मना आधीन । तयांसी बंधन यम करी ॥३॥

अर्थ :
अरे मानवा तू कोणतेही कर्म चांगलेच कर, वाईट कर्मा विषयी तू मनाच्या आधीन होऊ नकोस. आणि त्याचे कोणत्याही प्रकारचे काहीही बोलणे ऐकू नको. मनाने कोणत्याही वाईट कर्माचा अट्टाहास धरला तर तो मोडून टाक. आणि पांडुरंगाशी तू संबंध जोड, तू तुझ्या मनाला आपला अधीन करून ठेवीन नाहीतर हे तुझ्या जीवासाठी घातक होईल. तुकाराम महाराज म्हणतात जे लोक मनाच्या आधीन झाले आहेत त्यांना यम आपल्या बंधनाने बांधून टाकतो.