3131.
कुंकवाची ठेवाठेवी । बोडकादेवी काशाला ॥१॥
दिवस गमा भरा पोट । का गे नेटनेटावा ॥धृपद॥
दिमाख हा कोणा दावा । लटकी जीवा चरफड ॥२॥
तुका म्हणे झोंडगी हो । फुंदा का हो कोरडी ॥३॥

अर्थ :
कुंकवाची उठाठेव बोडक्या देवीला म्हणजे विधवा स्त्रीला कशासाठी पाहिजे ? आता कसेतरी पोट भरुन दिवस काढा उगाच का नटासारखे नटता. अहो हा दिमाख तुम्हाला कोणाला दाखवायचा आहे जीवाची व्यर्थ चडफड तुम्ही का करुन घेता ? तुकाराम महाराज म्हणतात, अहो झोंड बायांनो उगाचच हा कोरडा नखरा का करतात ?