1520.
जया शिरी कारभार । बुद्धि सार तयाची ॥१॥
वर्ते तैसे वर्ते जन । बहुता गुण एकाचा ॥धृपद॥
आपणीया पाक करी । तो इतरी सेविजे ॥२॥
तुका म्हणे शूर राखे । गांडया वाखे सांगाते ॥३॥

अर्थ :
ज्याच्यावर मोठा कारभार करण्याची जबाबदारी असते त्याची बुद्धी नेहमी धर्मनीती संपन्न असावी. तो जसे वर्तन करील त्याप्रमाणे सर्व वर्तन करतात आणि त्याचा सद्गुण सर्वाना मिळतो. आपण आपल्या करिता जर अन्न तयार केले तर चांगलेच करतो त्याप्रमाणे आपण जर चांगले वागलो तर आपले पाहून इतर लोकही तसेच वागतात. तुकाराम महाराज म्हणतात शूर मनुष्या बरोबर राहिले की आपले रक्षण होते आणि भित्र्या मनुष्य बरोबर राहिले की आपली फजिती होत असते.