759.
ऐसिया संपत्ती आम्हा संवसारी । भोगाचिया परि काय सांगो ॥१॥
काम तो कामना भोगीतसे देवा । आलिंगणे हेवा चरण चुंबी ॥धृपद॥
शांतीच्या संयोगे निरसला ताप । दुसरे ते पाप भेदबुद्धी ॥२॥
तुका म्हणे पाहे तिकडे सारिखे । आपुले पारिखे निरसले ॥३॥

अर्थ :
आम्हाला या संसारात अमाप संपत्ती लाभली आहे ती संपत्ती म्हणजे या विठ्ठलाचे प्रेम आहे, त्याचे आम्ही आंनदाने भोग घेत आहो. याचे वर्णन कसे करावे ? आमच्या सर्व कामना इच्छा देवाचे भोग घेत आहेत, त्या विठ्ठला आम्ही आलिंगन देऊन त्याच्या चरणाचे आम्ही चुंबन घेतो. आमची वृत्ती शांत झाली आहे त्या योगे आमचा ताप निरसला आहे व पापाचे निरसन होऊन आमची सर्व भेद बुद्धी संपली आहे. तुकाराम महाराज म्हणतात जिकडे पाहवे तो विठ्ठलच तिकडे दिसतो त्यामुळे आमचे व परक्याचे हे भेदच संपून गेले आहे.