721.
रिद्धीसिद्धी दासी कामधेनु घरी । परि नाही भाकरी भक्षावया ॥१॥
लोडे बालिस्ते पलंग सुपत्ति । परि नाही लंगोटी नेसावया ॥धृपद॥
पुसाल तरि आम्हा वैकुंठीचा वास । परि नाही राह्यास ठाव कोठे ॥२॥
तुका म्हणे आम्ही राजे त्रैलोक्याचे । परि नाही कोणाचे उणे पुरे ॥३॥

अर्थ :
आमच्या घरी समोर रिद्धी सिद्धी दासी आहेत, काय पाहिजे ते द्यायला कामधेनु आहे, पण आमच्या मनात कसलीही अपेक्षा आसक्ती नसल्यामुळे आम्हाला धड भाकरी देखील खायला मिळत नाही. आमच्या कडे लोड, तक्के, गाड्या, पलंग व सर्व सुखसोई आहेत, पण आम्ही इच्छा रहितआहोत त्यामुळे नेसायला वस्त्र देखील नाही. आम्हाला विचारले की, आम्ही कोठे आहोत तर आमचा निवास वैकुंठात आहे परंतु, आम्हाला राहावयास कोठेही जागा नाही. तुकाराम महाराज म्हणतात आम्ही जगाचे या त्रैलोक्याचे राजे आहोत पण आम्हाला कोणाचेही उणे दुने नाही.