1507.
यज्ञ याग दान व्रत उद्यापन | हे नेणे मी साधन काय करू ॥१॥
जप तप होम स्वधर्माचरण | नव्हे तीर्थाटण कांही मज ॥२॥
गया पिंडदान प्रयागीचे स्नान | कर्म अनुष्ठान नव्हे मज ॥३॥
भक्ति उपासना देवाचे पूजन | ध्यान उपोषण नव्हे मज ॥४॥
पृथ्वीचे भ्रमण अनुताप संपूर्ण | सारासार खूण नकळे कांही ॥५॥
पुण्य नाही गांठी पापाचे संचित | परम पतित वाटे मज ॥६॥
माझा देह आहे पातकांचा थारा | मी अपराधी खरा कळलेसे ॥७॥
पुराणप्रसिद्ध नाम तुझे सार | ऐसे निरंतर बोलताती ॥८॥
अन्यथा वचन नोहे है प्रमाण | तरी ब्रीदे जाण सांडवली ॥९॥
तुम्ही ब्रीद आपुले जतन करणे | तरी नारायणे सांभाळावे ॥१०॥
नामेंविण कांही आम्हांपाशी नाही | विचारोनी पाही पांडुरंगा ॥११॥
धन वित्त सर्व आमची हे जोडी | नामा म्हणे गोडी नामी तुझे ॥१२॥