1422.
काया वाचा मने श्रीमुखाची वास । आणीक उदास विचारांसी ॥१॥
काय आता मोक्ष करावा जी देवा । तुमचिया गोवा दर्शनासी ॥धृपद॥
केलिया नेमासी उभे ठाऊ व्हावे । नेमले ते भावे पालटेना ॥२॥
तुका म्हणे जो जो कराल उशीर । तो तो मज फार रडवील ॥३॥

अर्थ :
मी काया, वाचा, मनाने हरी च्या श्रीमुखाच्या दर्शनाची वाट पाहत आहे आणि त्यामुळेच मी बाकी विचारांविषयी उदास आहे. मी मोक्ष घेऊन तरी काय करू, देवा मी जर मोक्ष घेतला तर मला तुमचे सगुण दर्शन होणार नाही. मी खऱ्या निश्चयाने तुमचे दर्शन घेणार आहे आणि माझ्या निश्चयामध्ये कोणताही बदल मी करणार नाही. तुकाराम महाराज म्हणतात देवा मला दर्शन देण्याविषयी तुम्ही जसजसा उशीर कराल तर तो उशीर मला फार रडवेल कारण मला आता धीर धरवत नाही.