608.
नाही उल्लंघिले कोणाचे वचन । मज का नारायण दुरी जाला ॥१॥
आशंकिते मने करी आळवण । नाही समाधान निश्चिंतीचे ॥धृपद॥
दासांचा विसर हे तो अनुचित । असे सर्व नीत पायांपाशी ॥२॥
तुका म्हणे तुम्हा लाज येत नाही । आम्हा चिंताडोही बुडविता ॥३॥

अर्थ :
मी कोणत्याही श्रेष्ठांचे वचनाचे उल्लंघन केले नाही, असे असता आमच्या पासून नारायण का दूर झाला ? याच शंशायाने मन नारायणाला आळवीत आहे. या शंशायामुळे माझ्या मनाची समाधान स्थिती स्थिर नाही. तुम्हाला तुमच्या दासांचा विसर पडतो हा तर अनुचित प्रकार आहे सर्व धर्मनीती तुमच्या पायापाशी चा आहे. तरी तुम्ही असे का वागता ? तुकाराम महाराज म्हणतात देवा आम्हाला चिंतेच्या डोहामध्ये बुडवतांना तुम्हाला लाज कशी वाटत नाही ?