1881.
देव मजुर देव मजुर । नाही उजुर सेवेपुढे ॥१॥
देव गांढ्याळ देव गांढ्याळ । देखोनिया बळ लपतसे ॥२॥
देव वर काई देवतर काई । तुका म्हणे राई तरी मोठी ॥३॥

अर्थ :
देव भक्तांचा मजूर आहे. त्याने भक्तांकडून सेवारूपी वेतन घेतले असल्यामुळे त्याला भक्तांची सेवा करण्याविषयी ' हो, नाही ' अशी कोणतीच सबब सांगता येत नाही. देव, मोठा भित्रा व नामर्द आहे. कारण, भक्तांचे भावबळ पाहून तो लपून बसतो. तुकाराम महाराज म्हणतात, देव केवढा आहे म्हणता ! एखादी मोहरी तरी मोठी असेल इतका तो सूक्ष्म आहे.