2256.
कोणी सुना कोणी लेंकी । कोणी एकी सतंता ॥१॥
अवघियांची जगनिंद । जाली धिंद सारखी ॥धृपद॥
अवघ्या अवघ्या चोरा । विना वरा मायबापा ॥२॥
तुका म्हणे करा सेवा । आले जीवावर तरी ॥३॥

अर्थ :
गवळणी मध्ये कोणी सुना कोणी लेकी तर कोणी सासवा होत्या म्हणजे तीन प्रकारच्या, एक मुक्त दुसरी मुमुक्षु आणि तिसरी विषयासक्त, हया सर्व गवळणी हरीच्या रूपाला भुलल्या होत्या. त्यामुळेच तर त्या सर्व गवळणींची जगात निंदा झाली आणि त्यांची चेष्टा सर्व लोक करू लागले. त्या सर्व गवळणी घरी आई बाप पती घरच्या कोणालाही न विचारता चोरून चोरून देवाला येऊन भेटत असत. तुकाराम महाराज म्हणतात अगदी त्या गवळणी प्रमाणे हरिची सेवा करावी जरी जीवावर काही आले तरी देखील देवाची सेवा करावी.